 Икки ёш оилали бўлишга қарор қилганида ҳеч бирининг хаёлидан қачондир ажрашиб кетиши мумкинлиги ҳақидаги фикр ўтишига ишониш қийин. Турмуш қуриш остонасида турганларнинг барчаси бахтли бўлиш истагида қадам ташлайди.
Таҳририятимизга «турмуш ўртоғим билан келишолмаяпман, оилам нотинч, ажрашсаммикан, маслаҳат беринг» деган мазмундаги мурожаатлар кўп бўлади. Бугун уларни умумлаштирган ҳолда оиласи ажрим остонасида турганларга кўзгу тутмоқчимиз. Чунки ажрим муаммонинг ечими эмас. Психология фанлари номзоди, доцент, руҳшунос Соҳибжамол ЖЎРАЕВА билан биргаликда оилани сақлаб қолиш борасида ўз тавсияларимизни ҳавола этамиз. Ажрим ёқасига келган оилалар ўзларига керакли маслаҳатни топа олишларига ишонамиз.
Эркаклар ажрашувга нималарни сабаб деб билади?
«Рафиқам менга тамоман беэътибор. Худди ҳаётида менинг ўрним йўқдек. Мен бунга кўнолмайман». «Нозик масала»да жуда нўноқ, гўёки бу фақат менга керакдек муносабатда бўлиши жаҳлимни чиқаради. Ўртада меҳр бўлмаса, бирга яшашдан нима фойда?»». «Оила аъзоларим билан умуман чиқишолмайди. Бўлар-бўлмасга талашиб-тортишаверади. Жанжални ўзи бошлаб, кейин «ёнимни олмадингиз» деб менга жаҳл қилади. Ота-онамни ҳурмат қилмай қўйгани сабримни тугатди». «Телефонда кўп гаплашиши, интернетда тинимсиз ўтириши рашкимни келтиради. Танишларимдан у ҳақда ҳар хил гапларни эшитяпман. Бирон эркак билан гаплашяпти деб гумон қиляпман». «Ёлғон кўп гапиради, қачон қарама, уйимиздаги муаммони онаси ва бошқа оила аъзолари билан муҳокама қилади. Натижада онаси фақат оиламиз ишларига аралашавериши жонимга тегди». «Терговчидан фарқи йўқ. Ҳар бир қадамимни назорат қилишга ҳаракат қилади. Пул беринг дея ҳар икки куннинг бирида дийдиё қилишидан тўйдим». «Ишлайман деб оёқ тираб туриб олган. Мен эса буни асло истамайман. Уйни, болаларни таъминлаб қўйганман. Борига шукр қилиб яшашни ўрганса бўларди». «Пазанда, қўли гул, ораста аёлим рўзғордаги ҳамма ишларни қилишга вақт топади. Менга бир оғиз ширин сўз ёки меҳр беришга келганда чарчаган, кайфиятсиз бўлади.
Руҳшунос маслаҳати: шуни билингки, сизнинг орзуларингиздан аёлингизники ҳам қолишмайди. Айбни бировга ағдариш қанчалик осон бўлмасин, қарс икки қўлдан чиқишини унутманг. Аёлингиз хато иш қилса ёки унинг ҳаракатлари сизга ёқмаса, жаҳл отига минмасдан, секин-аста тушунтиринг. Ишдан қайтишингизга севимли таомингиз ва ширинликларни тайёрлаб қўядиган ёрингиз наҳотки шу гапларни қабул қилмайди деб ўйласангиз? «Ичимдагини топ» ўйинини ўйнашга бироз катталик қиласиз. Бирон нимани талаб қилишдан аввал аёлингизга ўрнак бўлинг. Ажрашсангиз, ҳаётингиз бундан-да яхши бўлишига ким кафолат беради?
Аёл нега ажрашмоқчи бўлади?
«Эрим ўзини бутунлай ишига бағишлаган. Менга буткул эътиборсиз. Диванга ёнбошлаб, телевизор кўришдан ортмайди. Стадионда футбол кўришга чўнтагидаги охирги пулини ҳам сарфлайди. Уйда нима бор, нима йўқлиги билан эса иши йўқ. Унинг учун борим ҳам, йўғим ҳам билинмаса, нима қиламан бирга яшаб?» «Фақат ўзининг гапи, фикрини маъқуллайди. Унинг назарида, аёлнинг гапини тингласа, хотинига бўйсунадиган эркакка айланармиш. Ундай қилайлик, бундай қилайлик деб фикримни айтсам, «тилинг чиқиб қолдими» деб жанжални бошлаб юборади. Жанжаллардан чарчадим. «Рўзғор ёки фарзандларимиз билан боғлиқ ҳамма масалаларни ота-онаси ёки ака-укалари билан ҳал этади. Менинг фикрим билан қизиқиш ҳеч кимнинг эсига келмайди. Уй ишлари учунгина керак бўлсам, мени қийнамай, хизматкор олсин». «Хиёнат қилиб, менинг, фарзандларимнинг юзига оёқ қўйишидан, бўлар-бўлмасга рашк қилаверишидан тўйдим». «Эримнинг оила аъзолари қилдан қийиқ ахтариб, мени камситаверишади. Турмуш ўртоғимдан эса бу вақтда ёрдам кутиш бефойда. Чунки онасининг чизган чизиғидан чиқмайди».
Руҳшунос маслаҳати: — Эркаклар билан аёлларнинг руҳий олами бир-биридан фарқ қилишини унутманг. Эрингизнинг кўнглига йўл топиш учун ораста бўлинг. Оиладаги аҳиллик кўп жиҳатдан аёлга боғлиқ, шунинг учун ўз норозилигингизни ошкора намойиш қилманг. Ширин сўз ва чиройингиз билан қайсар, дангаса эрингизни йўлга сола оласиз. Аввало ўзингизга эътиборли бўлинг. Эр хотинининг уй ишлари, келинлик хизматини оддий юмуш деб баҳолайди. Бу ишларингизга аҳамият бермаса, беҳуда ранжиманг. Ажрашиб, эрингиздан яхшироқ инсонни топишингизга ишончингиз комилми? Ўша инсон сизга яхши эр бўлар балки, лекин фарзандларингиз учун отасидан яхши бўлолмаслиги аниқ.
Қайнонанинг позицияси
«Атрофимда гирдикапалак бўлиб, юзидан табассум аримайдиган, қўли олти, оёғи етти бўлиб югуриб-еладиган келин кўришга ҳаққим бор ахир! Ақлли, эсли-ҳушли, ишбилармон ўғилни катта қилганимдан кейин шунга яраша роҳат кўришни исташим айбми?» «Бир ишни эплаб қилолмайди. Рўзғорда ҳамма нарсани тежаш кераклигини билмайди. Уқувсизлигидан уйимдан барака қочди». «Тилини тиёлмайди. Гап қайтаришда менинг келинимга етадигани бўлмаса керак». «Овсини ва қайнисинглиси билан чиқишмайди. Аввалига уларнинг ўзи келишиб олар, дегандим. Мен индамаганим сари келиним авжига чиқа бошлади». «Онасига оиламиздаги гапларни ташийверади. Натижада онасининг иштирокида уйда кунда жанжал...»
Руҳшунос маслаҳати: — Уйингизга ўзга муҳитда катта бўлган инсон келди, унинг хатти-ҳаракатларини қабул қилишга ҳануз қийналяпсиз. Келинни оила аъзосига айлантириш аввало сизнинг қўлингизда. Яхши муомалангиз сиз кутган натижани албатта беради. Келинингиз уй-жойини, ота-онаси, яқинлари ва ўзи ўрганган шароитни ташлаб келган. Янги шароит, уй ва турли феъл-атворли оила аъзоларига кўникиш осон эмас. Ўзингизнинг келинлик даврингизни эсланг. Сиздаги тажриба ва билим ўз-ўзидан пайдо бўлмаган. Ёшлигингиздаги қийинчиликларнинг аламини келиндан олманг. Келиннинг уй юмушларида нўноқлиги бир оилани барбод қилиш учун етарли сабаб эмаслигини унутманг.
Келиннинг онасининг позицияси
«Оқ ювиб, оқ тараб, асраб-авайлаб катта қилган қизимни ўқитиб, ҳунарли қилиб, ўзга хонадонга узатдим. Эртадан кечгача тинмай қайнона-қайнотасига хизмат қилади, катта оилани эплайди. Лекин уйидагилари қизимдан норози бўлавериши мени руҳан чарчатди». «Қўлида гулдай ҳунари бўлса ҳам, эри ишлашига қарши. Биз қизимни емай-ичмай контрактда ўқитсак-у, биргина эрининг рашки ёки қайнонасининг қайсарлиги учун уйида сўлиб ўтириши яхшими?» «Бечора қизим ўша уйда икки болали бўлди, лекин ҳали эгни тайинли кийим, қўли пул кўрмади. Айт десангиз, гапирадиган гапим кўп. Қиз туққаннинг тили қисиқ бўлади дейишганича бор экан».
Руҳшунос маслаҳати: — Қизингиз энди ўзга оила аъзоси. У оилада сизнинг иштирокингиз қанчалик кам бўлса, унинг ҳаёти тинчроқ бўлади. Қайнона учун келиннинг пазанда, хушмуомала ва чаққон бўлиши мажбурият ҳисобланади. Сиз ҳам куёвингизни ҳунарли, ўқимишли, топармон-тутармонлиги учун мақтамаганингиздек, қизингизни ҳам қайнонаси қилган ишлари учун алқашини кутмаган маъқул. Ўй-фикрларингиз билан уйингизга ойда бир ё икки марта келадиган қизингизни заҳарламанг. Муаммолари билан ўзи курашишига ташлаб қўйинг демаймиз, лекин ўша муаммолар келиб чиқишига сабабни ҳам топиб берманг.
Ажрашувдан кейинги ҳаёт
Статистик маълумотларга кўра, ажрашган жуфтликлар аксарият ҳолларда қайтадан оила қуришга ҳаракат қилишади. Бунга имконияти бўлмаган эркаклар ўзини овутиш учун ичкиликка ружу қўяр, аёллар эса сурункали тушкунлик, йиғини одатга айлантирар экан.
— Ҳозирги ақлим бир йил аввал бўлганида... эрим билан ажрашмасдим. Фарзандим учун ҳам ҳаммасига чидашим керак эди. «Ёлғиз аёлнинг ёзиғи қурсин» деган гап рост экан. Кўчадан ўтган ҳар қандай эркак ҳам этагингга осилиб кўришга ҳаракат қилиши алам қиларкан...
Адолат, Жиззах вилояти
— Биринчи хотиним билан муомаласи қўпол, эътиборсиз дея ажрашгандим. Ўшанда 3 ёшли қизим ҳам кўзимга кўринмаганди. Ёмонни кўрмагунча яхшининг қадрига етмас экансиз. Иккинчи хотинимни нима деб таърифлашни билмайман. Лекин чидашга мажбурман, чунки ундан икки фарзандим бор.
Қудрат, Самарқанд вилояти
— Фариштамисол келинимнинг қадрига етмаган эканман. Афсуски, буни энди тушундим. Айтган ҳамма ишимни индамайгина қиларди. Кичик бир хатоси учун ҳам қаттиқ уришсам ердан кўз узмасди. Мен эса буни безликка, писмиқликка йўйгандим. Онаси ўпмаган деб олган иккинчи келиним эса бошим ёстиққа текканида бир пиёла сувга зор қиляпти.
Фазилат, Наманган шаҳри
— Эркатой қизимнинг ҳаёти яхши бўлсин деб, бир марта жеркиб берган куёвимдан ажратиб олиб келдим. Уйимга қайтиб келган қизим ва икки набирамни сўлиб бораётганини кўриб хато қилмадимми деб ўйлайман. Эр-хотиннинг орасига тушган мен аҳмоқ.
Мамлакат, Тошкент шаҳри
— Ҳаммаси гўёки яхшидай. Эримни ишхонасидаги аёллардан рашк қилишим ажрим билан тугади. Бир қиз ва ўғлимни ўзим билан олиб қолдим. Иккинчи марта турмушга чиқдим. Эрим фарзандларимни ажратмайди, оталик қилади. Лекин ўз отаси билан учрашиб қайтиб келишганида анча вақтгача паришон юришади. Ота меҳридан айирганим учун ўзимни айбдор ҳис қиламан.
Нигора, Бухоро вилояти
Айбдорларни излашдан аввал ўзингизга бир разм солинг. Хато фақатгина бир инсондан ўтади, деган фикр нотўғри, ўзингиздан ўтгани сизга сезилмагандир балки? Айбни англаш, тўғирлаш билан ҳаётингизда уларни такрорламасликка иммунитет ҳосил қиласиз. Бир нарса аниқ, ажрим билан оиладаги муаммони ҳал этиб бўлмайди! Фарзандларнинг келажаги катталарнинг худбинлиги эвазига зарар кўрмаслиги лозим.
Дилноза МИРТОЛИПОВА
Manba: www.VaqtQadri.com -Saytdan olindi.
Ushbu ma'lumot #vaqtqadri #hikoyalar #sherlar #mazmunlisatrlar #monologlar #hangomalar #latifalar #qiziqarli #savollar #savoljavob dan olindi!
< ! > DO'STLARINGIZGA YUBORING:
Супер Новости:
REKLAMA
| 
